"ثوّار ولسّه هنبتدى الثورة" قصيدة لسعيد حامد شحاتة

"ثوّار ولسّه هنبتدى الثورة

" قصيدة لسعيد حامد شحاتة

ثوار لآخر نقطه فى الشرايين
ثوار لآخر فرد ع الساحه
ثوار يا نافخ حكمتك فى الطين
يا ساتر الفلاح بفلاحه
ثوار يا حالف بالزتون والتين
ثوار يا خالق قلبى تفاحه

******
ثوار يا واحه يا نخل يا تنّين
ثوار يا بنت بنوت يا يوم الدين
يا صدر أم بيبتسم لجنين
ثوار يا خلق يا منتجات الصين
يا كلاب بتنهش طيبة الساكتين
ثوار وواقفين ع السكك صفّين
ناخد عزانا ونزرع الميداين

ثوار وبادرينك جناين فل
ثوار وطالعين نرسمك فى الطل
ثوار يا ذل يا عيش يا حرّيه
ثوار بحد النار يا عذريه
ثوار يا سوره يا ناى يا عِديّه
يا أرض طارحه الورد بالنيّه
يا قلب بنيّه لحمام الريح
يا عيون حبيبتى ف حضرة المراجيح
ثوار بدون تصريح على الأعتاب
ثوار يا حضره يا حبّتين عنّاب
ثوار يا قبقاب خالتى زنوبه
التوبه تُقْبل م اللى تابها بجد
وإحنا اللى مش تايبين ولا توبه
ثوار هاتور، أمشير وتوت وكياك
ثوار بؤونه وهجّامين طوبه
ثوار وقلبك لسه بيعاند
ثوار وراسك لسّه مقلوبه
ثوار يا سهم الروح يا معطوبه
يا أم الضفاير لسه معصوبه ف خلايا الراس
ثوار يا ناس يا قصر يا حراس
ثوار يا آيه بتكسر الوسواس
ثوار يا أحلى لباس على العوْره
ثوار وبنناور كلاب البيه
ثوار وكلبه اتهز بمناوره
ثوار وقلبك رمحنا بيحييه
ثوّار ولسه هنبتدى الثوره

» حمد لله يا ريّس قصيدة لسعيد حامد شحاتة
» "يا مصر ليه بعتينا للمندس" قصيدة لسعيد حامد شحاتة
» وائل غنيم يبكى على شهداء الثورة
» قصيدة لماذا
» قصيدة لامير الشعراء